रास्वपालक्षित गर्दै शंकर पोखरेलले भने- नयाँ दल आएपछि विदेशीनेको संख्या झन् बढ्यो

नेकपा एमालेका महासचिव शंकर पोखरेलले नयाँ दल आएपछि विदेश जाने नेपालीको संख्या झन् बढेको बताएका छन् ।  

मंगलबार बिहान सामाजिक सञ्जालमार्फत उनले ‘विदेश जान रोक्छु’ भन्ने दल आएपछि झन् विदेश जानेको संख्या बढेको बताएका हुन् । पोखरेलले एमाले सरकारमा आउँदा रोजगारीका लागि विदेशमा जाने घट्ने र सरकारबाट हट्दा बढ्ने तथ्यले देश बनाउन सक्ने पार्टी एमाले हो भन्ने जनविश्वासलाई उजागर गर्ने पनि उल्लेख गरेका छन् ।  

‘नेकपा एमाले सरकारमा आउँदा रोजगारीका लागि विदेशमा जाने घट्ने र सरकारबाट हट्दा बढ्ने तथ्यले देश बनाउन सक्ने पार्टी एमाले हो भन्ने जनविश्वासलाई उजागर गर्दछ । तर, तथ्यहिनरूपमा पुराना पार्टीका कारणले विदेशीने बढे भनेर नेकपा एमालेलाई समेत जोड्ने प्रयास गर्नु कुप्रचार हो,’ पोखरेलले लेखेका छन्, ‘विदेशमा गएकाहरूलाई देश फर्काउँछौँ भन्नेहरूलाई गएको निर्वाचनमा जनताले लोकप्रिय मत दिए । तर उनीहरू राष्ट्रिय पार्टीकारूपमा नेपाली राजनीतिमा उदय भएपछि नै विदेशीनेको संख्या झन् बढ्यो । के यसको जिम्मेवारी नेकपा एमालेले नै लिनुपर्ने हो र ?’  

उनले नयाँ र पुरानाका नाममा पक्ष र विपक्षमा बाँडिनुभन्दा एजेन्डाका आधारमा ठीक र बेठीक छुट्याउने गरी समस्याको समाधानका लागि छलफल र बहसमा जोडिनु जनता र राष्ट्रको हितमा हुने पनि उल्लेख गरेका छन् ।